هديتين غاليتين

هديتين غاليتين ، من اثنتان اعتبرهما من أعز أصدقائي المدونين ، سووول حبيبتي ، بنت المنصوره ،
وعاشقة الرومانسيه ، روح اسكندريه ،

جزيل شكري وتقديري لهما ، وخالص حبي ، والآن

مع التاج الاول : تاج سووووول

السؤال الأول : بدأتِ التدوين امتي ؟ودخلتِالعالم ده ازاي ؟

اجابة السؤال الأول : نحن شعب لا تهزنا الرياح العاتيه ، فهل يهزنا تاج يقول : اجب عن الاسئله الاتيه ؟؟؟

طبعا آه ، الاجابه اهي يا قمر ، بدأت تدوين في نوفمبر 2008 ، تحديدا أول تدوينه كانت 29 نوفمبر ، سنه كبيسه يعني ، هههههههههه ، وفي اليوم الكبيس كمان ،

اما بقي دخلت هذا العالم ازاي ، فعن طريق صديقتي وحبيبة قلبي وقريبتي وبنت عمتي العزييييزه ، شيماء زايد صاحبة مدونة همسات القلم الرائعه ، هي سبقتني لهذا العالم ، ونشرت عن طريقه اعمالها الأدبيه ، وهي كانت قرأت بعض من اعمالي وعجبتها وهي اللي شجعتني ادون وكمان هي اللي عملت المدونه وصممتها ورتبتها لولا بس اللون الاسود اللي معاندين بعض فيه ، المهم ان شيماء حبيبتي وروووووح قلبي هي اللي اخدت بايدي وفتحتلي الباب .

السؤال الثاني : ايه كان انطباعك في البدايه ؟

ج : اولا مكنتش اعرف حد ولا حد يعرفني ، فكل مدونه كنت بدخلها كنت ببقي مندهشه ، الاول كنت متخيله انها ادبيه بس ، لكني لقيت مذكرات ويوميات وصحافه وحاجات كتير متنوعه ، فكان انطباعي الاندهاش والدعبسه .

السؤال الثالث : مين اكتر حد بتحب تعليقه عالبوست الجديد ؟
ج: اكتر حد ، اي حد بيكون بيعلق من واقع قراءته وفهمه ، مش من باب هاي والسلام ، ومن اكتر الناس اللي بستني رأيهم ، شيماء ، وناس كتير جدا جدا ، بحبهم وبثق في رأيهم ، كمان الناس اللي بتستني جديدي وبيشجعوني ، واكتر اي حد بيتفاعل مع الموضوع .

السؤال الرابع : ايه أهم حاجه اتعلمتها في عالم التدوين ؟

ج : احترام الآخرين ، تقدير الرأي ، ان الدنيا فيها مواهب كتير وشخصيات كتير محترمه .

السؤال الخامس : ايه اكتر حاجه كرهتها ؟

ج : ما اظنش اني كرهت حاجه لسه ، بس بكره النفاق عموما .

السؤال السادس : حاسس ان التدوين ليه تأثير ؟

ج : أعتقد ان فيه بعض المدونات ليها تأثير شخصي عليا ، لكن تأثير عام ومغير ، لسه مدخلتش المرحله دي .

السؤال السابع : تهدي التاج لمين ؟

ج : اولا شيماء زايد ، ثانيا : كل حد واي حد يقرا التاج ده او يشوفه عندي .

تم بحمد الله التاج الاول .

التاج الثاني : تاج عاشقة الرومانسيه ،

السؤال الأول : اذكر ستة اسرار لا يكتشفها من يقابلك لاول مره ؟

ج : وكده هتبقي اسراس ازاي يعني ، عموما ،

اعتقد انها :
1: الهدوء .

2: التواضع .

3: الصراحه المطلقه .

4: العصبيه .

5: كتومه شويه .

6: اخلاصي .

السؤال الثاني : سبع حاجات نفسك تعملهم ؟
ج : 1: نفسي اسافر بلد بعيده ذات أقليه مسلمه مضطهده ومحدش يعرفني فيها ومحدش يسأل ليه لو سمحتوا .
2: كمان نفسي اجمع كل اصدقائي واهلي وكل الناس اللي بحبهم ونتصور صوره كلنا مع بعض .

3،4،5،6،7 : اشوف انسان عزيز عليا جدا واحج ونفسي في حاجه بس سر محدش هيعرفها ابدا غير اما تتحقق .

السؤال الثالث : سبع حاجات معرفتش تعملهم ؟

ج : مش عايزه افتكرهم اصلا انا دلوقتي بفكر في اللي عايزه اعمله .

السؤال الرابع : سبع حاجات دايما بتقولهم ؟

ج: يا رب ، ان شاء الله ، اوك ، ما شاء الله ، الله يكرمك ، الحمد لله ، استغفر الله العظيم .

السؤال الخامس : سبع مشاكل في حياتك ممكن تحلهم بالفلوس ؟

ج: كتير مش سبعه ، حتي كمان بقي فيه مشاعر بالفلوس .

السؤال السادس : سبع اماكن بتحبهم ؟

ج: اسكندريه ، الفيوم ، دمنهور ، البحر ، النيل ، السما ، مكان في خيالي .

السؤال السابع : اشخاص بتحبهم غير ماما وبابا واخواتي ؟

ج: اصدقائي كلهم ، وخالو عمرو ، وخالتو فيفي ، وعلا ، وشيماء .

السؤال الثامن : مدونين بتحب تقرالهم ؟

ج: أي حد بيكتب باحساس وعنده هدف ، وهم كتير علي فكره .

السؤال التاسع : تمرر الواجب ده لمين ؟

ج: برده لاي حد وكل حد يقراه ويحب يجاوبه ، واولهم شيماء زايد .

ولهم مني سؤال بقي ، استعدوا :

س : ايه الحاله اللي بتكون فيها وانت بتكتب وايه طقوسك ؟

ولكل انسان علق عندي وهداني هديه شكر عميق جدا ، وبالاخص اصحاب الهديه دي واقولهم : تحيه اسكندرانيه جدعه موت .

دمتم مع الاعتذار الشديد لحبيبتي اللغه العربيه .