كرات البسكوت الملونة

قبل جم يوم قريت طريقة حلوو عجبني (كرات البسكوت الملونه) في منتدى كويتيات وامس طبقت الطريقة :)

الطريقة

خلطة كور البسكوت

- 4 باكيتات كبار (بالنسبة لي استخدمت 12 حبة من اللي بالكرتون)

- 1 حليب محلى نستله

- 1 زبدة لورباك

- 2 ملعقة اكل ماي دافىء

الكريمه

- ا قيمر KDD

- 4 حبات جبن كيري

- 1 ونص كيس دريم ويب

- 3 الوان طعام (احس نوع اللي على صورة الحرمه المبرقعه الباقي اللي على فاكهه كلش موشي)

نطحن البسكوت بمطحانة القهوة
بعدين نخلط البسكوت المطحون مع الزبدة بعد مانسيحها وحليب نستله المحلى وقفشين الماي الدافىء

نخلط لما تتكون عندنا عجينة نقدر نشكلها (اذا صارت سائلة زيديها بسكوت مطحون لما تشوفينها صكت وتقدرين تشكلينها)

نخلط الحين مقادير الكريمة

الكيري والدريم ويب ونص حليب نستله المحلى والقيمر

بعدها نقسم الكريمه الى 3 صحون علشان نخلطهم بالالوان اللي عندنا

انا اخترت الاحمر اللي صار وردي والازرق والاخضر

نسوي من عجينة البسكوت كور بالحجم اللي نبيه

بعضهم حطيت فيهم لوز

نغمس كل كره بلون ونصفهم بالصينية او الطبق

بعد ما نخلص نزينهم بفليك

ونقز بكل كره عود اسنان ونحطها بالثلاجه علشان يبردون قبل التقديم

ان شاء الله عجبكم وبالعافية مقدماً